«Սև շրջան» խորագիրն է կրում անվանի բանաստեղծուհի Անահիտ Թարյանի այս նոր գիրքը, քանզի նրանում զետեղված բանաստեղծությունները, լինելով մեր հեղհեղուկ ու վիճահարույց ժամանակների, մեր դաժան և հաճախ անմարդկային իրականության, մեր ժողովրդի գոյապայքարի, ազգային խնդիրների՝ նոր հայեցակետից դիտարկման ու նորովի բացահայտման խիզախումի գեղարվեստական ազնիվ ու ճշմարիտ արտացոլումը, ակամա ստեղծում են յուրահատուկ սև շրջանի զգացողություն, սև շրջան, որին, սակայն, անպայման հաջորդելու է մեր կյանքի լուսաբացի, մեր երկրի և ժողովրդի զարթոնքի ու վերելքի սպիտակ, ասել է, թե լուսավոր և լավատեսորեն պայծառ շրջանը...

Բանաստեղծուհին հոգով զգում և անվհատ հավատում է գալիք սպիտակ շրջանի լինելությանը, իսկ այդ հավատը պայծառ է, լուսավոր և վարակիչ...